Joriy yilning 19-22-dekabr kunlari Oʻzbekiston Respublikasi Prezidenti huzuridagi Statistika agentligi, Yevropada xavfsizlik va hamkorlik tashkilotining Oʻzbekistondagi loyihalari Koordinatori, Dasturiy mahsulotlar va axborot texnologiyalari texnologik parki (IT-Park) hamda Korrupsiyaga qarshi kurashish agentligi hamkorligida oʻquv-treninglar kurslari tashkil etildi.
Mazkur oʻquv treningda mamlakatimizda davlat organlarining ochiqligini oshirish va ochiq maʻlumotlar ekotizimini rivojlantirish mavzusida treninglar oʻtkazildi.
Ushbu oʻquv treninglar Prezidentimizning 2019-yil 9-apreldagi “Davlat boshqaruvining ochiqligi va shaffofligini taʻminlash hamda mamlakatning statistik salohiyatini oshirish yuzasidan qoʻshimcha chora-tadbirlar toʻgʻrisida”gi PQ-4273-son qarori va 2022-yil 14-iyundagi “Davlat organlari va tashkilotlari faoliyatining ochiqlik darajasini oshirish va baholash tizimini joriy etish chora-tadbirlari toʻgʻrisida”gi PF-154-son Farmoni hamda Vazirlar Mahkamasining 2020-yil 23-dekabrdagi “Oʻzbekiston Respublikasida Ochiq maʻlumotlar sohasini yanada rivojlantirish chora-tadbirlari toʻgʻrisida”gi 808-son qarori ijrosini taʻminlash maqsadida tashkil etildi.
Treninglarda: Ochiq maʻlumotlar tushunchasi, mashinada oʻqiladigan formatlar, ochiq maʻlumotlar portallari, “Ochiqlik indeksi”, mamlakatimizning ochiq maʻlumotlar sohasida oxirgi yillarda erishgan natijalari va bu sohadagi mavjud boʻlgan muammolar muhokama qilindi.
Treninglarda 153 ta vazirlik va idoralarning ochiqlikni taʼminlashga masʼul boʻlgan 200 nafardan ziyod vakillari ishtirok etdi.
Tadbir soʻngida “Ochiq maʻlumotlar sohasini rivojlantirish” boʻyicha tashkil etilgan ushbu oʻquv-treninglarni kelgusida ham muntazam oʻtkazish, xodimlarning ochiq maʻlumotlar bilan ishlash boʻyicha malaka va koʻnikmasini oshirib borish yuzasidan fikr-mulohazalar almashildi.
Trening ishtirokchilariga sertifikatlar topshirildi.
Bu trening ochiq maʻlumotlar haftaligi “Open Data Week 2023” doirasida tashkil etildi.